ໃນຕອນເຊົ້າວັນທີ 27 ມິຖຸນາ 2018 ນີ້, ສໍານັກງານຄະນະກໍາມະການຄຸ້ມຄອງຫຼັກຊັບ
ຮ່ວມກັບ ບໍລິສັດຫຼັກຊັບປາຊີຟິກ ຫຸ້ນສ່ວນ ຈໍາກັດ ຈາກ ສປ.ຈີນ
ໄດ້ຈັດການເຝິກອົບຮົມກົນໄກຈັດຕັ້ງປະຕິບັດການຊື້-ຂາຍຫຼັກຊັບ ຂຶ້ນທີ່ນະຄອນຫຼວງວຽງຈັນ ໂດຍການເຂົ້າຮ່ວມຂອງທ່ານ ສຽວສະຫວາດ ທີລະກຸນ ຮອງຫົວໜ້າສໍານັກງານ
ຄະນະກໍາມະການຄຸ້ມຄອງຫຼັກຊັບ, ທ່ານນາງ Kang Jing ຜູ້ອໍານວຍການ ບໍລິສັດຫຼັກຊັບປາຊີຟິກ ຫຸ້ນສ່ວນ ຈໍາກັດ ສປ.ຈີນ
ພ້ອມດ້ວຍຄະນະອໍານວຍການ, ຄະນະພະແນກ, ຄະນະກໍາມະການຄຸ້ມຄອງຫຼັກຊັບ ແລະພາກສ່ວນທີ່ກ່ຽວຂ້ອງເຂົ້າຮ່ວມ.
      ຈຸດປະສົງຂອງການສໍາມະນາ
ຄັ້ງນີ້ ເພື່ອເສີມສ້າງຂີດຄວາມສາມາດໃຫ້ແກ່ຜູ້ທີ່ມີສ່ວນຮ່ວມໃນຕະຫຼາດທຶນຂອງ ສປປ. ລາວ
ໂດຍສະເພາະ ບໍລິສັດຫຼັກຊັບ ໂດຍຜ່ານການແລກປ່ຽນຖອດຖອນບົດຮຽນ ແລະປະສົບການຈາກ ສປ.ຈີນ
ເປັນຕົ້ນແມ່ນບົດບາດໃນການຊອກຫາ ແລະ
ດຶງດູດບລິສັດຕ່າງໆໃຫ້ເຂົ້າມາຈົດທະບຽນໃນຕະຫຼາດຫຼັກຊັບ ລວມທັງລົງເລິກເຖິງຜະລິດຕະພັນ
ແລະ ການບໍລິການຂອງ ບໍລິສັດຫຼັກຊັບ ປາຊີຟິກ ຫຸ້ນສ່ວນ ຈໍາກັດ.
     
 ໃນໂອກາດນີ້,
ທ່ານ ສຽວສະຫວາດ ທີລະກຸນ ກ່າວວ່າ: ເພື່ອເປັນການຖອດຖອນບົດຮຽນ
ແລະປະສົບການທາງດ້ານວຽກງານຫຼັກຊັບ ໂດຍສະເພາະແມ່ນບົດບາດ ແລະ
ການມີສ່ວນຮ່ວມຂອງບໍລິສັດຫຼັກຊັບເຂົ້າໃນການພັດທະນາຕະຫຼາດທຶນໂດຍຈະລົງເລິກເຖິງການວາງຍຸດທະສາດ
ແລະຊອກຫາຊ່ອງທາງຂອງບໍລິສັດຫຼັກຊັບໃນການດຶງດູດບໍລິສັດເຂົ້າມາຈົດທະບຽນໃນຕະຫຼາດຫຼັກຊັບ
ແລະ ບົດຮຽນກ່ຽວກັບການວາງຍຸດທະສາດ ແລະ
ແນວທາງໃນການສ້າງຄວາມເຂັ້ມແຂງໃຫ້ແກ່ບໍລິສັດຫຼັກຊັບເຊັ່ນ:
ກົນໄກການຈັດຕັ້ງປະຕິບັດການຊື້-ຂາຍຫຼັກຊັບໂດຍບໍ່ວາງເງິນມັດຈໍາລ່ວງໜ້າ,
ການກູ້ຢືມເພື່ອລົງທຶນໃນຫຼັກຊັບ ແລະ
ການສ້າງສະພາບຄ່ອງໃຫ້ແກ່ຕະຫຼາດຫຼັກຊັບ ລວມທັງ ການຊອກຮູ້ຂໍ້ມູນລູກຄ້າ ແລະ
ຂະຫຍາຍຖານຜູ້ລົງທຶນ ແລະ ການກວດສອບທາງດ້ານການເງິນ, ການວິເຄາະ,
ການຕິດຕາມ ແລະຄວບຄຸມຄວາມສ່ຽງໃນການເຮັດ Due
Diligence ການອອກຫຼັກຊັບຄັ້ງທໍາອິດ.